طرق جديدة لتطفيش العريس

طبعا احنا بنات زى القمر

وكل شويه الباب يخبط

ونقول مييييين نلاقى
عريس ونرفضو

وميعديش يومين الا ونلاقى عريس تانى

وطبعا احنا نرفض
برده اصل مالناش نفس وكمان مستنيين لما ييجى اللى عليه العين ونوافق
عليه.......


فأنا حسيت بكل بنت بيحصلها كده فقلت لازم اعمل موضوع يكون
في حاجات نعملها ونطفش بيها عريس مش عاجبنا وعاجب اهلنا ( ده طبعا بأعتبار ان فيه
عريس عاوزين نطفشه)


1ـ اول مايطلبوكى عشان تدخلى وتقدمى الحاجات للضيوف
( طبعا عينك هتطلع على الحاجات دى وطبعا مش بتشوفيها الا فى المناسبات اللى زى
دى


لازم تلبسى طرحه حمرة وبلوزة لمونى وجيبه بنفسجى وطبعا الشبشب ابو
صابع بتاع الحمام الازرق وأى لخبطه فى الالوان يبقى تمام اووى ...


لو
متحولش وفضل قاعد وممشيش اول ماشافك يبقى لازم


2ـ تقدمى الجاتوه متاكل
منه حته صحيح هو الموقف مش ظريف بس لازم يحصل كده

لو منتبهش للجاتوهايا او
الحركه دى مفرقتش معاه يبقى لازم

3ـ اى حاجه يتكلمو فيها اعترضى عليها حتى
لو قلك اسمك ايه ... قوليله انا مسمحلكش


لو حس كده انك بت شخصيه وعجبو
فيكى الحته دى :

4ـ امسكى كل الاكل اللى متقدم قدامك وانسفيه سواء كان طبقك
او طبق غيرك عايزة نفسك تتفتح على الاخر ساعتها (طبعا انتى هتكونى بتاكلى بحق
وحقيقى لان عينك هتطلع على الحلويات اللى مش بتتقدم الا فى المناسبات وانتى
انتهزتيها فرصه)

لو كان بقى من اللى بيحب الناس الاكيله واتبسط اوى انك كده
:


5ـ طول ماانتى قاعده هزهزى فى رجلك واتاوبى واى حركه غريبه تيجى على
بالك اعمليها وانتى مرتاحه يعنى مجنونه رسمى.

لو لسه قاعد بعد كل ده يبقى
غتت ولزقه بغرة صحيح ...!!! بس معلش :

6ـ اطلعى وسيبى المكان اللى انتى
قاعده فيه وحسسيه انك مقروفه جامد ومش طايقه تبصى فى خلقته

لو افتكر ياحرام
انك بتعملى كده عشان مخنوقه من اهلك وهو اللى هينقذك منهم :


7ـ فهميه
انك مش بتعرفى تعملى حاجه ابدا وانك حتى البيضه بتقليها من غير زيت

لو قالك
مش مهم دى ماما معندهاش مانع تعلمك كل حاجه ... يبقى مش بغرة بس ده شكلو داخل على
طمع

8ـ فهميه انك بتحبى تشترى لبس كل يومين ولازم يكون عندك اجدد عربيه
والموبايل مفيش يوم الا لما يشحنلك رصيد يعنى هيتخرب بيته ...


لو قالك
برحتك ياروحى الحمد لله انا معايا اللى يجبلك كل الى انتى عايزاه واكتر
كمان


9ـ قوليله انا رافضه موضوع الارتباط ده مش عشان حاجه بس عشان انا
عايزة اعمل فرحى فى الهيلتون او الفور سيزونز وشهر العسل يكون فى


سويسرا
وانا خايفه انى اتقل عليك عشان كده بلاش احسن

اذا رد عليكى ساعتها وقالك
طلباتك اوامر .... .


10ـ تضربى نفسك بمتين جزمه !!!

مش عشان هو
لسه موجود لاء ده عشان لسه بتفكرى انك ترفضيه لان مفيش حد يرفضه مستحمل كل ده
ومستريح بالشكل ده


ولو لسه مصممه انك مش عايزاه

دليه على اى
واحده صحبتك او حبايبك هو حد لاقى ياشيخه

ملحوظة : الموضوع علي سبيل التهريج
عشان محدش يفهم غلط